गुरु महिमा :- केवटियो म्हाने मिल गयो जी , कर दियो भव से पार ।

दोहा :-- नदियां बहु गहरी मिली , पड्यो भंवर मंझार ।
चतुराई म्हारा केवट की , म्हाने कर दियो परली पार ।।
कर   दियो  परली  पार ,  पायो  प्रेम   पदारथ   पासा ।
सत चित आनन्द रुप पायो , सोहन शिखर गढ़ वासा ।।

टेर:-केवटियो म्हानै मिल गयो जी ,कर दियो भव से पार ।।
      कर दियो भव से पार , म्हाने मिल गयो सिरजन हार।।

(1) :-सत्य स्वरूपी केवट मिल गयो , दियो शबद पतवार ।
शब्द गिगन में गिरजन लाग्या , अनहद हुई झनकार ।।
(2) :-अनहद गरजै ज्योती चमके , छाई गगन घटा इकसार ।
इमरत बूंदा बरसण लागी , नित नित नई फुंहार ।।
(3):-पार ब्रहम रो भेद बतायो , खोल्यो दशवों द्वार ।
हंसा मोती चुगणै लाग्या , मान सोरावर मझधार ।।
(4):-सोहन शिखर गढ़ प्रीतम मेरा , बैठ्या आसन मार ।
आवागमन की मिटी कल्पना , पाया मोक्ष द्वार ।।
(5):-नेकीराम जी गुरु समझावें , सतपुरूषां रा सार ।
दास महेन्द्र महिमा गावै , गावै मंगला चार ।।।।।।।
                          ईतिश्री